→ عودة إلى مرئيات
السلام عليكم، بدون مقدمات.. في كلمتين "واقفين في الزور" ولازم أحكيهم، خصوصاً لمشاهير السوشيال ميديا. على ما يبدو أن العالم تعود، والناس مَلّت وبطلت تتفاعل وتتأثر زي قبل، بس إحنا في غزة ما تعودنا، ولا حنتعود، ولا بدنا نتعود على اللي بيصير معنا.
خلو كفة اهتمامكم بالحياة الطبيعية في جهة، ونشر طلعاتكم ونزلاتكم على السوشيال ميديا في جهة ثانية. بتنزلوا المطاعم والكافيهات والحفلات اللي بتروحوا عليها؛ احترموا إنه في بشر زيكم في غزة مش ملاقيين اللقمة ياكلوها! احترموا إنه في أطفال بتموت جوع في غزة، احترموا إنه في ناس كل يوم بتستشهد وبتفقد أحبابها وأهلها وناسها وأصحابها.
ما تدخلش عندي على التعليقات ألاقيك معلق: "يا الله، حسبنا الله ونعم الوكيل، قلوبنا بتتحرق عليكم"، وبعد شوية أدخل على "الستوري" عندك ألاقيك بتطلع وترقص وتغني وفي حفلة وفي "نيلة"! يا بتكون هيك يا بتكون هيك، بدناش تعاطفك معنا إذا كان مجرد منظرة وعشان الناس ما تهاجمك.
لا تستخفوا بعقول الناس؛ إذا بدك تقف مع قضية غزة بس عشان تبعد كلام الناس عنك، أو عشان "العتب"، فالله الغني عنك، لأن قضية غزة وقضية فلسطين أكبر من هيك بكتير.
يا ريت كلنا نفهم هذه الشغلة، لأنه أقسم بالله الواحد وصل لآخره. مش أنتم اللي بتندبحوا في غزة، مش أنت اللي بتنجبر تصور أشلاء وأطفال رؤوسهم مفتوحة، مش أنت اللي بتيجي على ثلاجة الموتى بتلاقي عشرين شهيد قدامك منهم أهلك، مش أنت اللي بتضطر تصلي على أمك وأبوك وإخواتك صلاة الجنازة.
أنتم قاعدين في الفنادق وفي الحفلات وفي الطلعات والنزلات، الواحد بيدخل على "ستورياتكم" من الذل اللي بنشوفه بيحس حاله من كوكب ثاني! ولا كأنه إحنا عايشين معكم، ولا كأنه بيننا وبينكم كم متر!
احترمونا يا جماعة، احترمونا.. إحنا بشر زينا زيكم، احترموا إنه في بشر في غزة قاعدين "بيندبحوا" كل يوم. فاحترموا هذه الشغلة بس، وبعينكم الله؛ قيدوا شوية حياتكم (الخاصة) على السوشيال ميديا.