مقدمة: خطر القوانين الجديدة على الأسرة المسلمة
السلام عليكم. هذه الكلمة هي بخصوص مشروع خطير جداً هنا في الأردن وفي باقي بلاد المسلمين، راح يؤثر علينا وعلى أولادنا وديننا وأخلاقنا إذا تم تمريره. ألا وهو إصدار قوانين متعلقة بأطفالنا على اعتبار أنها مرتبطة باتفاقية موقعة مع الأمم المتحدة. كثير من الناس لا يعلم أن هناك قوانين يراد إصدارها ولا يتصور حجم الخطر. فهدفنا هو التوعية ورفع الصوت حتى لا يحدث هذا التغيير.
تعمدت اليوم أتكلم بالعامية لأني أريد أن يصل كلامي لكل واحد. وإذا لزم أعيده بالفصحى ليفهمه إخواننا في بلاد أخرى فما عندي مانع. المهم النصح للجميع.
وقبل ما أخوض في الموضوع، اسمح لي أسألك سؤال: لو واحد جاي من الشارع قال لك "بدي أوصل ابنك أو بنتك للمدرسة"، وأنت ما بتعرف اسم هذا الشخص ولا أصله ولا دينه ولا أخلاقه، وطلعت ابنك أو بنتك الصغار معه. شو بكون اسمك؟ خائن، ما عندك غيرة، مش هيك؟
طيب لو دخلت على بروفايل هذا الشخص على مواقع التواصل فشفت له فيديو وهو ماسك الويسكي وعيونه حمرا وبايل على حاله وهو بيوصل أولاد الناس. شفت السي في تاعته (السيرة الذاتية) ونزلت شوية في بوستاته وطلع مجهول النسب، تاجر مجلات وأفلام إباحية، وشفت له بوستات وهو بيورجي الأطفال أفلام إباحية وبيربيهم على السعار الجنسي وبيفاخر بهذا الكلام. فسألته: "هذا أنت اللي في البروفايل؟" قال لك: "أيوه، بس أنا لما آخذ أولادك على المدرسة راح أراعي قيمك وأعرافك ودينك وتقاليدك". هل ممكن ترد على هذا الشخص بغير البصقة في وجهه والطرْد من البيت؟
فكيف إذا لما بحثت عن تاريخه الجنائي وجدت أنه لما توكل إليه مهمة حراسة مدرسة أطفال بيروح وبيغتصبهم، بل ومتورط في الاتجار بالبشر، وبينشر بينهم الأمراض الجنسية على شان يخلص من قسم منهم، وله تاريخ طويل من هذا النوع، وأنه هناك توثيق لهذا كله. فكيف إذا عرفت أن الله عز وجل أخبرك عنه أنه ما بده لك ولا لأولادك إلا الشر؟ لأ، وجاي مش بس بده يوصل أولادك، لأ وكمان يتدخل فيك كيف تحكي معهم وكيف تربيهم، ويرافق في مشوار حياتهم كله لحد ما يوصلهم جهنم.
تصور لو هذا الأزعر الهمل هجم على خزانة فلوسك وسرق أموالك، وهجم على ثلاجتك وسرق أكلك وأكل عيالك وقال لك: "أعطيني أولادك أربيهم على كيفي وإلا ما إلك مصاري ولا أكل". تصور لو واحد من أهل البيت تعاون مع هذا الهامل وساعده يسرق مالك وطعامك وطلع على سطح البيت وخزق تنك المية عشان تموت عطش وحكى لك: "اسمع كلام الشوفير بلاش تموت أنت وأولادك". إيش بكون اسم هذا المتعاون؟
الرد على الاعتراضات والمغالطات الشائعة
لحظة، قبل ما تضللوا الجماهير بخطابكم الشعبوي، إيش دخل هذا المثال الدرامي بموضوع كلمتك عن قانون الطفل الذي يراد إقراره في الأردن وفي باقي بلاد المسلمين؟ يعني أنت بتشبه الأمم المتحدة هذه الهيئة العالمية المحترمة العريقة، بتشبهها بهذا الشوفير الهامل؟ أها، شكلكم بينطبق عليكم الكلام اللي بيقول: "هناك تيار بالبلد أخذ على عاتقه مهمة تضليل الناس في القضايا المتعلقة بالحقوق الإنسانية للمرأة والطفل، تهويل، تحوير، وتكسب من شعبوية". طالما كثير من الناس لا يقرأ، شكلكم تجار دين بتتكسبوا من جهل الناس. وإلا فالناس لو قرأت مسودة قانون الطفل المقدمة لمجلس النواب، مش راح تلاقي فيه أي شيء غلط. بس أنتم اللي أعداء المرأة والطفل وحقوق الإنسان، يا ظلاميين يا رجعيين، يا متعصبين يا جهلة يا متخلفين.
نقاط الاعتراض والرد عليها
- "إيش ماله قانون الطفل؟ زعلانين عشان بيمنع ضرب الأولاد؟"
- هالّا عاد بدكم الآباء المجرمين يضرب الواحد فيهم ابنه لحد ما يتصبغ وجهه، ولا يمكن يكسر إيده. ولا الأب المحترم ما بيحتاج يضرب بالمرة.
- "زعلانين عشان مشروع الطفل اللي بيمنع الأب يضرب بنته إذا شافها بتراسل شب ولا بتطلع مع شب؟"
- يعني هو الحل في الضرب ولا في النقاش والحوار والإقناع؟ ولا بدكم تطلعوا بنات منافقات؟
- "زعلانين عشان قانون الطفل بيعطي الحق للأبناء غير الشرعيين يتسجلوا في دائرة الأحوال المدنية وتكون لهم حقوقهم المدنية؟"
- شو ذنبهم هدولا الأولاد إذا أمهم غلطت في لحظة ضعف؟ ولا بدكم ترموهم في البحر يعني وتخلصوا منهم؟
- "زعلانين القانون بيطلب تثقيف الأولاد والبنات عن الحياة الجنسية؟"
- ها لا عاد بدكم تطلعوا الشب والبنت لما يتزوجوا يكونوا هبل بلا مؤاخذة، مش عارفين إشي عن الحياة الجنسية فما ينجح زواجهم، ولا يكون حضرته ماخذها آلة ومش مراعي حاجاتها العاطفية؟ مش عارفين حضراتكم أنه كثير من حالات الطلاق سببها الفشل في غرف النوم؟ ولا عاجبكم تخلف المسكينة عن أولادها ما تعرف تربيهم أو تموت حرام من حمل غير آمن؟ ولكم لاحظوا حتى اسمها "الصحة الجنسية"، يعني بدنا أولادنا وبناتنا يكونوا أصحاء.
- "مش عاجبكم حرية التعبير اللي بتنص عليها مسودة قانون الطفل؟"
- بدكم الولد يضل مخروس مكبوت مقموع عشان تضلوا تنفسوا عقدكم النفسية وشعوركم بالنقص فيه المسكين؟
- "مش عاجبكم أنه القانون بينص على احترام خصوصية الطفل في مراسلاته؟"
- بدكم تتجسسوا عليه وعليها وتعتبروا خصوصية أطفالكم مستباحة؟ مش التجسس حرام على حساب؟ مش رب العالمين قال: ﴿وَلَا تَجَسَّسُوا﴾؟
- "شو اللي مش عاجبكم في قانون الطفل؟"
- أه؟ احكوا! تأكيده على محاربة المخدرات والإدمان وتوفير التعليم والإرشاد النفسي. هاتوا لنا نص واحد في القانون فيه مخالفة صريحة لديننا الإسلامي وقيمنا الأصيلة.
- "أي حتى حرية الطفل في الوجدان والدين شالتها الحكومة مع أنه لو خلتها ما فيها إشي."
- يعني بدكم نكره الناس على الإسلام؟ مش الله قال: ﴿لَا إِكْرَاهَ فِي الدِّينِ﴾؟
- "الحكومة شالت من قانون الطفل السماح للمراهقات بالإجهاض، مع أنه إذا بدك رأيي كان لازم يخلوه."
- لأنه افرض أنه بنت اغتصبها واحد متوحش وحملت منه بالحرام، مش تجهض أحسن لها؟ ولا بدك إياها تنفضح من المجتمع اللي ما بيرحم وتخلف ولد عشان الناس يحكوا عنه ابن حرام؟ خايف الإجهاض يكون حرام؟ يا أخي خليها تجهض في بدايات الحمل وقبل نفخ الروح. احنا بنأسلم القوانين زي ما بدنا. فحتى لو خلوا قوانين حرية الدين وحرية الإجهاض ما فيها شيء.
- "مش الحكومة ولجنة المرأة والطفل بالتعاون مع لجنة القانون في مجلس النواب قالوا أنه القانون مصاغ بما يراعي قيمنا وديننا وثقافتنا الأردنية؟"
- مش واثقين فيهم يعني؟ ولا بدكم تزاودوا عليهم وتعملوا حالكم أحرص على أبنائنا منهم؟
- "يعني أنتم مفكرين أنه العالم بيستهدفكم كمسلمين وجاي يحارب دينكم ويدمر أخلاق أولادكم؟"
- يا أخي العالم مش سائل فيكم ولا شايفكم ولا خايفكم من كثر ما أنتم ضعاف ومتخلفين. كل إشي بتعملوا منه نظرية مؤامرة، نظرية مؤامرة. الأمم المتحدة عندها قناعات شايفه هي أنه خير للبشرية. مش متفق مع هذه القناعات أنت حر، لكن لا بالتآمر علينا. ﴿إِنَّ بَعْضَ الظَّنِّ إِثْمٌ﴾.
- "هلأ لما الدول تتفق أنه اللون الأخضر يعني امشي يا سيارة، واللون الأحمر وقفي يا سيارة. ولما تصطلح الدول على أنه سن 18 مناسب للزواج مثل ما هو مناسب لقيادة السيارة. صار هذا اسمه مؤامرة؟"
- كمان تعالوا، مش دول المسلمين هي أعضاء في الأمم المتحدة؟ يعني هذه القوانين اللي بيصوغوها مش الكفرة اللي بيصوغوها زي ما بتدعوا وبتحرضوا الناس. لأ، هاي قوانين تصاغ بالتفاهم والتشاور بين ممثلين مسلمين وغير مسلمين من كل دول العالم. يا أخي اسمها "الأمم المتحدة" لتكونوا بتقرأوها "الأمم المتحدّة". شكلكم حتى عربي ما بتعرفوا تقرأوا. ولا لتكونوا بتكفروا مندوبي دولنا لدى الأمم المتحدة؟ أها، بدينا تكفير وكتابة صكوك للنار.
- "ليش مش عاجبك قانون الطفل؟ خايف على أولادك منه؟ إيش هذا الدين الهش اللي بتربي أولادك عليه؟ ومش قادر تحميهم من شوية تغيير في القوانين."
- ربيهم على الدين واتركهم، ويا جبل ما يهزك ريح. أنتم طول عمركم تحكوا الإسلام في خطر والأبناء في خطر. ما لهم أبناءنا وما له الإسلام؟ هاي هالجوامع مفتوحة، ونسائنا محجبات، وأبناءك ما حدا مانعك تربيهم. كمان يعني أنتم وقفت معاكم على مشروع قانون الطفل هذا بالذات.
- "مش أنتم نفسكم بتقولوا أنه القوانين وضعية مخالفة لأحكام الشريعة الإسلامية؟ إيش الجديد في الموضوع؟ حسب كلامكم؟ خربانة خربانة."
- كمان مش دين الله منتصر؟ والله متم نوره؟ هي شوية تغييرات في القوانين راح تمحو الإسلام من الوجود يعني؟
- "إيش بدكم؟ وباقي بلاد المسلمين ما تلتزم المواثيق الدولية؟ هو احنا يعني عايشين على كوكب المريخ؟ مش احنا جزء من هذا العالم والمنظومة الدولية؟"
- بدكم الأردن وباقي بلاد المسلمين يرفضوا أي تعديل في القوانين حتى ولو أدى ذلك إلى حرماننا من مساعدات صندوق الأمم المتحدة؟ يعني حضراتكم مستعدين تدفعوا ملايين الدنانير بدل هذه المساعدات الإنسانية اللي الواحد فيكم مش لاقي ياكل؟
- "على فكرة، اللي بيدافعوا عن قانون المرأة والطفل وبعض جزئياته كتاب مسلمين محجبات كمان."
- بس بتعرف الفرق بينكم وبينهم أنهم هم بيقرأوا وأنتم ما بتقرأوا. الفرق أنهم حريصين على المرأة والطفل، وأنتم يا الرجال الظلاميين بدكم تظلوا تستغلوا المرأة والطفل وتقمعوهم.
- "على فكرة، ملاحظين يا ظلاميين واحنا بنرد عليكم بكم آية استشهدنا وبكم حديث؟ احنا مسلمين أكثر منكم."
- أنتم اللي ما بتفهموا قرآن ولا سنة ولا إسلام ولا بتقرأوا وإذا قرأتوا ما بتفهموا. صدقة من قالت تضليل وتهويل وتحوير وتكسب من شعبوية لأنه الناس ما بتقرأ.
إيش رأيكم يا إخوانا؟ كلام هذا الشاب شكله مقنع، أليس كذلك؟ عندك رد؟ والله هو أنا بصراحة مش بس عندي رد على كل نقطة من النقاط العشرين اللي ذكرها، وإنما سأريكم حجم الخداع أو الجهل وتفاهة المغالطات التي تمارس في عرض هذه الاعتراضات واحدة تلو الأخرى. الموضوع كبير وخطير. الموضوع يساوي ديننا ودين أبنائنا، ومستقبلنا ومستقبل أبنائنا. فلازم نفصل فيه ونناقشه نقطة نقطة. وراح نخصص هذا الأسبوع لحماية الطفل. ساعرض عليكم أيها الكرام مجموعة حقائق موثقة مكثفة مهمة وصادمة. توعيك على المؤامرة الكبرى عليك وعلى أبنائك. فالمعركة تبدأ بالوعي.
فضح حقيقة الأمم المتحدة وأجندتها
بداية القصة
القصة أن هيئة الأمم المتحدة كانت قد أصدرت معاهدة حقوق الطفل ووقع على هذه المعاهدة مسؤولوا الدول المسلمة، مع تحفظ بعض الدول على بعض بنود المعاهدة كونها بتخالف الدين والعادات والتقاليد. وطبعاً بيضعوا دين الإسلام الحق والأديان المحرفة والعادات في سلة واحدة.
طيب ما دامت بتخالف الإسلام ليش وقعتوها؟ يا احنا تحفظنا. رفضنا الالتزام ببنود معينة من المعاهدة بكل كرامة وإباء ومراعاة لسيادة الدولة وهيبتها واستقلالها. وبهذا تمتص الصدمة في البدايات.
الآن بعدما دولة معينة توقع المعاهدة بتصير مطالبة أمام الأمم المتحدة بإجراء تعديلات في قوانينها لضمان تحقيق بنود المعاهدة. وعلى مر السنوات مندوب كل دولة لدى الأمم المتحدة تتم مساءلته عن سرعة تنفيذ التعديلات القانونية لتحقيق بنود المعاهدة. طبعاً هذه المعاهدة ليست في أشياء فنية مثل تنظيم خطوط الملاحة الجوية عشان طائرات بلادنا ما ترتطم بطائراتهم. بل هذه معاهدات متعلقة بالقيم والأخلاق والمعاملات التفصيلية والتشريعات والعلاقات الاجتماعية والحقوق والواجبات بين الناس، يعني منظومة حياة. وبما أن الذين يصوغونها لا منطلقاتهم ولا قيمهم إسلامية، فراح ينتج عن ذلك بنود متعارضة مع الإسلام.
وسائل النظام الدولي لإسكات الشعوب
علشان تسكت الشعوب الإسلامية عن تنفيذ بنود المعاهدة هناك عدة وسائل يتخذها النظام الدولي وأدواته:
- رفع التحفظات: ذكرنا أنهم بيتحفظوا على بعض البنود كونها معارضة للدين والقيم كما ذكرنا. فمرات في ليلة ما فيها ضو قمر، ترفع الدولة تحفظاتها على البنود التي كانت تحفظت عليها. ولا مراعاة خصوصية محلية ولا مجلس شعب ولا شيء من كل هذا الديكور الديمقراطي. وهذا ما حدث مع معاهدة سيداو للمرأة التي تحفظت دول كثيرة على بعض بنود